|
|
-
- D a s n a r r e n s c h y f f .
L X X V I . V o n g r o s s e m r u e m e n
- __________________________________________
- Ritter Peter von altten joren
Ich můß uch griffen an die oren
Mir gdenckt / das wir beid narren woren
Wie wol / jr fűren ritters sporen
![](bra_n076.jpg)
- Von grossem ruemen
- Die gæcken / narren / ich ouch bring
Die sich berűmen hoher ding
Vnd wellent syn / das sie nit sint
Vnd wænen / das all welt sy erblindt
- 5
- Mann kenn sie nit / vnd frag nit noch /
Mancher will edel syn / vnd hoch
Des vatter doch macht bumble bum
Vnd mit dem kűffer werck ging vmb /
Oder hat sich also begangen
- 10
- Das er vacht mit eynr stæheln stangen
Oder rant mit eym juden spyeß
Das er gar vil zů boden stieß
Vnd will das man jnn juncker nenn
Als ob man nit syn vatter kenn
- 15
- Das man sprech / meyster hans vō Mētz
Vnd ouch syn sůn juncker Vincentz /
Vil rűmen hoher sachen sich
Vnd bochen stæts zů widerstich
Vnd sint doch narren jnn der hut
- 20
- Alls ritter Peter von Brunndrut
Der will das man jm ritter sprech
Dann er zů Murten jn dem gstech
Gewesen sy / do jm so not
Zů flyechen was / das jm der kot
- 25
- So hoch syn hosen hatt beschlembt
Das man jm weschen műst das hembd
Vnd hat doch schiltt / vnd helm dar von
Brocht / das er sy eyn edel man
Eyn hapich hat farb wie eyn reyger
- 30
- Vnd vff dem helm eyn nest mit eyger
Dar by eyn han / sitzt jnn der muß
Der will die eyger brűten vß
Der selben narren fyndt man mer
Die des went haben gar groß ere
- 35
- Das sie sint vornan gwesen dran
Do es wolt an eyn flyehen gan
Lůgten sie hynder sich langzyt
Ob jnn noch kæmen ouch me lüt /
Mancher seyt von sym væchten groß
- 40
- Wie er den stach / vnd jhenen schoß
Der doch von jm was wol als wytt
Er dæt jm mit eynr hantbüchß nüt /
Vil stellen yetz noch edeln woppen
Wie sie fűren vil lwen doppen
- 45
- Eyn krnten helm vnd guldin feld
Die sint des adels von Bennfeldt
Eyn teyl sint edel von den frowen
Des vatter saß jn růprecht owen
Synr můter schiltt gar mancher fűrt
- 50
- Das er villicht am vatter jrrt /
Vil hant des brieff vnd sygel gůt
Wie das sie sint von edelm blůt
Sie went die ersten sin von recht
Die edel sint jn jrm gschlecht /
- 55
- Wie wol ichs nit gantz straff noch acht
Vß tugent ist all adel gemacht
Wer noch gůt sytt / ere / tugent kan
Den haltt ich fűr eyn edel man /
Aber wer hett keyn tugent nitt
- 60
- Keyn zůcht / scham / ere / noch gůte sytt
Den haltt ich alles adels lær
Ob joch eyn fürst syn vatter wer
Adel alleyn by tugent stat
Vß tugent aller adel gat /
- 65
- Des glich / will mancher doctor syn
Der nye gesach Sext / Clementin
Decret / Digest / ald jnstitut /
Dann das er hat eyn pyrment hut
Do stat sin recht geschriben an
- 70
- Der selb brieff wißt / als das er kan
Vnd das er gůtt sy vff der pfiff
Dar vmb so stot hye doctor Gryff
Der ist eyn gelert / vnd witzig man
Er grifft eym yeden die oren an
- 75
- Vnd kan me dann manch doctor kan
Der ist doch jn vil schůlen gstanden
In nohen / vnd jn ferren landen
Do doch die guch nye kamen hyn
Die mit gwalt went doctores syn
- 80
- Mann můß jnn ouch her doctor sagen
Dar vmb das sy rott rck an tragen
Vnd das eyn aff jr můter ist /
Ich weiß noch eynen heysßt hans myst /
Der will all welt des über reden
- 85
- Er sy zů Norwegen / vnd Schweden
Zů Alkeyr gsin / vnd zů Granat
Vnd do der pfeffer wechßt / vnd stat
Der doch nye kam so verr hyn vß
Hett syn můter / do heym zů huß
- 90
- Eyn pfannkůch / oder würst gebachen
Er hetts geschmeckt / vnd hren krachē /
Des rűmens ist vff erd so vile
Das es zů zælen næm groß wile
Dann yedem narren das gebryst
- 95
- Das er wil sin / das er nit ist
|
|